Aholkuen intentsitate maila igotzen doa, eta gaurkoak -bueno, izenburuan ikusi duzue honezkero- konpromiso apur bat gehiago eskatzen du: zure Android gailuen hizkuntza euskarara aldatzea da.
Baina Joxe, nik iPhonea edo iPada daukat!
Tira, ba hala bada, gaurkoan libratu egingo zara. Appleren hizkuntz politika latza da euskarari dagokionez. Bere sistemak berak ez euskaratzeaz gain, boluntarioek euskaratzea ere eragotzi egiten du. Honezkero ezagutuko duzue batallita zahar hau, Applek hainbat boluntariori Mac OS X sistema euskaratzeko partxeak zabaltzea debekatu zigunekoa…
Zorionez, badirudi Googlek beste jarrera bat duela, eta Android gailu askotan (baina ez guztietan) euskara ezarri daiteke sistemaren hizkuntza gisa. Hori egiten duzunean, sistema bera (eta euskaratuta dauden aplikazioak) euskaraz agertuko zaizkizu. Eta euskaratu gabe dauden aplikazio eta mezuak, berriz ingelesez.
Jarri Android euskaraz: eskuzko konfigurazioa
Hizkuntza konfigurazioa aldatzea OSO erraza da. Sistemaren ezarpenetara joan, eta han bilatu ‘Hizkuntza’ aukera (idioma y teclado agertu ohi da gazteleraz). Barrura sartu gero, sisteman erabilgarri dituzun hizkuntzen zerrenda bat ikusiko duzu, eta egin behar duzun bakarra da euskara bilatu, eta aurkituz gero, aukeratu, edo zerrendaren lehen postuan jarri. Listo. Hortik aurrera zure gailua euskaldun peto-petoa izango da.
Hizkuntzen zerrenda Samsung gailu batean. Bai, euskara badago aukeren artean. OnePlus telefonoetako OxygenOS delakoan, ordea, euskararen arrastorik ez.
Jarri Android euskaraz Lehen Hitza aplikazioa erabiliz
Goiko prozedura hori oso-oso erraza da, benetan. Baina hala ere, oraindik errazago egin nahi baduzu, LehenHitza aplikazioa erabil dezakezu. Zure gailuan instalatu, eta berak begiratuko du posible ote den zure gailua euskaraz jartzea. Posible bada, berak egingo dizu konfigurazioa, botoi bati emanda.
Aplikazioak, gainera, zure telefonoaren gaineko informazio apur bat batuko du, datubase batean gordetzeko. Horrela, hurrengo telefonoa erostera zoazenean, orri honetan kontsultatu ahalko duzu, lehenengo eta behin, erosi nahi duzun gailua euskaraz jar daitekeen ala ez.
Sarrera honi buruzko galdera edo ekarpenik baldin baduzu, mesedez, erabili blogeko erantzunak horiek egiteko, ados?
Aupa Joxe!
Eskerrik asko hire ekimen honengatik…
Oso baliogarriak iruditzen zaizkidak geure ordenagailuak euskaltzaletzeko…
Hi, gauza bat, zertan duk Euskalbar? Bazebilek?
Aupa Inaxio!
Mila esker erantzuteagatik! Ta mila esker hemen egiteagatik! Sare sozialetan errazagoa eta azkarragoa duk, baina badakik, han erantzunak berehala galtzen dituk mundu guztiaren mezuen artean.
Euskalbar bazebilek, bai, noski. Nik behintzat instalatuta zeukeat nire Firefoxen eta sarritan erabiltzen diat.
Hemen duk Firefoxeko bertsiorako lotura: https://addons.mozilla.org/eu/firefox/addon/euskalbar/
Ta hemen Chromekoa. Ez zekiat Safari eta Edgerako ba ote dagoen… https://chrome.google.com/webstore/detail/euskalbar/jfemlmedfkiadfaihdcdkcoooleihhfn?hl=es
Ba igual hau izango aste honetako zazpi aholkuetatik zortzigarrena. Mila esker gogorarazteagatik!
[…] Android gailuak ‘euskaldundu’ […]
[…] jar daitekeen ala ez. Edo bestela Lehen Hitza Euskaraz aplikazioa erabili. Hemen aurkituko duzu pista gehiago, telefonoa oraindik euskaraz jarrita ez […]