Waze, GPS soziala

Udako oporrak izango dira, seguruenik, autoan GPS gailu edo aplikazio bat erabiltzeko arrazoi gehien dugun sasoia: oporrak pasatzeko aukeratu dugun herrira iristeko, egun bateko eskapadatxo arinak egiteko…
Zuotako asko GPSa erostekoan egongo zarete, gailu formatuan edo smartphonerako aplikazio gisa. Hala bada… itxaron apur bat zure sosak gastatu aurretik! Izan ere, bada doako GPS aplikazio bat, oso ondo funtzionatzen duena eta, gainera, besteek ez dituzten hainbat abantaila dituena.

GPS soziala

Waze du izena (irakurrita weiz, ingelesezko “ways” bezalatsu), eta nabigatzaile soziala dela esan daiteke. Beste GPSek bezalaxe, zauden lekutik besteren batera iristeko jarraibideak ematen dizkizu. Horraino nahiko arrunta da.

Hain arrunta ez dena da osagai sozialak Waze-n duen pisua. Mapen zuzenketak, trafikoaren egoera, ibilbide azkarrenak eta horrelako informazioa erabiltzaileek emandako datuetatik ateratzen du. Aplikazioa piztuta dagoen bitartean, Waze-k gure joan-etorrien inguruko informazioa jaso eta, informazio hori erabiliz, etengabeko hobekuntzak egin ditzake bere mapetan.

Datu batzuk (kokapena eta abiadura batez ere) automatikoki jasotzen ditu Wazek, baina beste batzuk erabiltzaileek ematen dituzte: radarrak non dauden, arrisku guneak, polizia nonbait ezkutatu den… Hobeto ulertzeko, hona Wazen aukera nagusien errepaso azkar bat.

 

Menu nagusia

Menu nagusia beste edozein GPS nabgitzailek izan dezakeenaren nahiko antzekoa da. Pantailaren beheko aldean topatuko dugu, ezkerrean. Sei aukera nagusi aurkezten dizkigu:

Nabigatu:

Botoi horretan klik eginda

, nora joan nahi dugun adierazi ahal diogu Wazeri. Modu ezberdinak ditugu hori egiteko:

• Bilaketa bat eginda: edozein hitz sartu eta bilaketa egiteko hainbat modu dauzkagu:
  • Wazeren datubasea (defektuz)
  • gure kontaktuak
  • Foursquare sare soziala
  • Google
  • Bing

GPS estandar batetik etorrita (Copilot Live erabiltzen dut sarritan, eta TomTom ere probatuta nago), esango nuke alderdi hau egin zaidala frustranteena. Copilot erabiltzean, lehenengo herria sartu, gero kalea, gero zenbakia, eta listo. Waze-k ez du eskema hori erabiltzen, eta nahasgarri suertatzen da hasieran. Hori bai, behin ohituta, Googlen zuzenean bilatu ahal izatea izugarri ona da eta oso ondo funtizonatzen du.

• Gogokoen bidez. Defektuz, Wazek labeko eta etxeko helbidea gordetzeko aukera eskaintzen digu, eta beste nahibeste gogoko ere gehitu ditzakegu zerrenda horretan
• ‘Atalka’ bilatuz. Atalak beste GPS batzuetan ‘POI’ deitzen direnak dira, intereseko lekuak: supermerkatuak, botikak, hotelak eta horrelakoak. Waze menuak halakoen zerrenda bat du, eta atal batean klik eginez gero horrelako lekuen bilaketa egiten du automatikoki, bere datubase propioa edo nabigaziorako erabili ahal diren Foursquare, Google edo Bing-ena erabiliz. Emaitzak kaskar samarrak dira momentuz, baina pentsatzekoa da hobetu egingo direla erabiltzaile gehiago daudenean.
• Azkenik, ‘Historia’ izeneko atalean markatu ditugun azken helbideak berreskuratu ahal ditugu. Oso baliagarria izaten da bilatzailean zuzenean topatzea kostatzen denean.

‘Topaketak’ menuan oinarrizko funtzio sozialak aurki ditzakegu: gure uneko kokapena SMS edo email bidez bidaltzea, Facebookera bidaltzea, eta abar.

‘Nire Waze‘ menuak, berriz, gure Waze kontuarekin lotutako hainbat alderdi kontrola ditzakegu: gure ikurtxoaren aldartea aldatu, Waze erabiltzaile taldeekin bat egin. Erabiltzaile talde horiek albisteak, mezuak eta arrisku abisuak konpartitzen dituzte taldeen ‘horman’ (FaceBooken bezala, baina sinplexeago).

Waze puntuazioaren berri ere izan dezakezu. Izan ere, mapak osatzeko, Wazeri komeni zaio erabiltzaileok aplikazioa ahalik eta denbora gehien piztuta eramatea. Kilometroak egitearren, edo bidean dauden gorabeheren berri ematearren, puntuak irabazten dira, eta horren berri ematen zaigu pantailan agertzen diren ‘goxoki’ dibertigarri batzuen bidez. Bada, atal honetan, norbere puntuazioaren berri jakin daiteke.

Alertak:

Menu honetan inguruan ditugu trafiko gorabeheren berri jakin dezakegu. Irudian ikusten denez, gorabehera horiek bost ataletan banatuta daude: poliziarekin lotutako gorabeherak, trafikoaren egoera, istripuak, ‘chit chat’ edo solasaldiak eta bestelakoak.

Alerta atal bakoitza, bere aldetik, hiru azpiataletan banatuta dago: inguruko guztiak (inguru hori zabal samarra da irudian ikusten denez), egin beharreko bidean daudenak, eta norbere taldekideek bidalitakoak.

Alerta menua

Esango nuke Wazeren balio erantsi nagusia bidean topatzen ditugun gorabeheren berri emateko botoi hau dela. Pantailaren beheko aldean dago, eskumatara, eta erraz samar maneia daiteke gidatzen goazela ere. Hala ere, gogoratu gidatzen zoazenean bideak izan behar duela zure erabateko lehentasuna, eta funtzio hau segurua denan soilik erabili behar duzula (atasko batean astiro-astiro zoazela, esaterako, edo albo batean geldirik bazaude).

Botoiari sakatzean, botoi gehiago agertuko zaizkigu pantailan, abisua azkar eman ahal izateko. Adibide praktiko batekin erakutsiko dizuet: aurreko astelehenean AP8ren Gerediagako irteera erabili nuen lehenengoz. Wazek ez zuen irteera berri horren berri, eta beraz, peajean geldi nengoela, alerten botoiari eman nion. Hor ondoan ikusten dituzuen aukerak agertu zitzaizkidan. ‘Error mapa’ aukeratu nuen, kontua maparen errore batez ohartaraztea zenez, eta ondoko aukera hauek agertu zitzaizkidan:

Salida no identificada aukeratu, bidaltzeko botoiari eman, eta listo, nire bideari ekin nion berriz. Handik ordu batzuetara, mezu bat jaso nuen e-mailez: editore batek nire abisua ikusi, Wazek erregistratutako ibilbidearekin erkatu, eta dagokion aldaketa egin zion mapari, irteera ireki berria bertan ager zedin. Aldaketa hori 15 bat egunetan agertuko da Wazek bideak kalkulatzeko erabiltzen duen mapa ‘ofizialean’. Mapa hori, gainera, norberak ere zuzen dezake ordengailuan, beti ere waze piztuta eraman duen inguruetan.

Antzeko prozedura jarraitu daiteke bidean ikusten dituzun lanak, istripuak, radarrak, poliziak eta abarren berri emateko. Maparen gaineko aldaketek denboratxo bat behar dute mapan agertzeko, baina gainontzeko gorabehera guztiak berehala agertzen dira gainontzeko ‘wazeroen’ GPSetan.

Alde eta kontra

Alde	Kontra
%100 dohainik Plataforma anitzak: iOS, Android, BlackBerry (Beta), Windows Mobile, Symbian Mapak azkar eta etengabe eguneratuta Mapa libreak Trafikoaren berri zuzenean, beste erabiltzaileengandik	Helbideak bilatzeko sistema findu beharra Mapak online kontsultatzen dira -> 3G kontsumoa eragiten du Ahozko argibideak beste aplikazio batzuetan baino eskasagoak Arreta desbideratzeko joera: abisuak, puntuazio ‘sariak’, gorabeheren berri ematen saiatzeko Zalantzak pribatutasunarekin. Nora doaz gure ibilbideen gaineko datuak? Jatorri israeldarra duela jakinda, kezka doblea! :/

Aitortu behar dizuet ni behintza maitemindu egin naizela aplikazio honekin. Probatu zuek, nahi baduzue, eta esango didazue! Beheko botoi horietatik jaitsi ahal dituzue Android eta iOS bertsioak, eta beste guztiak zuen mobiletik m.waze.com helbidera sartuta. (Ondoko QR kodea erabil dezakezue horretarako).