Blog hau ‘entxufatuta’ dago fedibertsoan, ActivityPub pluginaren bidez. Oso txukun doa eta gero eta aukera politagoak eskaintzen ditu, baina konturatu naiz bere momentuan erabaki txarra hartu nuela konfiguratzean.
Izena eta izana
Izan ere, blogaren erabiltzaile izena fedibertsoan @bloga@teknopata.eus da une honetan. Izen egokia litzateke, barne logikatik, blogak hainbat erabiltzaile baldin balitu, baina kanpora begira, apur bat arraro (eta ez oso adierazgarri) geratzen da erantzunak “@bloga” erabiltzaileari zuzentzea.
Beraz, erabiltzaile izena aldatzea erabaki dut, eta aurrerantzean @teknopata@teknopata.eus izango da erabiltzaile nagusia. Askoz garbiagoa iruditzen zait fedibertso zabalari begira.
Ondo ulertu badut, dagoeneko @bloga@teknopata.eus jarraitzen duzuenok ez duzue ezer egin behar erabiltzaile berriaren jarraitzaile ere egiteko. Baina bueno, badaezpada egon adi, bale?
Baratu eragozpenak. Hartuko diogu trukoa honi lehenago ala geroago! :-)
