ApliakTeknopataren ajeak

Bost arrazoi Whatsapp gorrotatzeko

2015(e)ko apirilak 15
2 min
6 iruzkin
Bost arrazoi Whatsapp gorrotatzeko 7 - teknopata.eus

apokalipsi-whatsappKomunikaziorako tresna estandarra bihurtu zaigu konturatu orduko. Jendeak arraro begiratzen dizu Whatsappik ez duzula esaten baduzu. Baina bai, zuk ere ondotxo dakizu: Whatsapp gorrotagarria da. Erdeinagarria. Whatsapp UPyD da, telefonoko apli bihurtuta. Hona bost arrazoi eder, berehalako mezularitza aplikazioa gaitzesteko.

  1. Facebook. Honezkero erdi ahaztuta daukagun arren, Whatsappen jabea Facebook da. Facebookek kontrolatu eta gordetzen du Whatsappen zer esaten dugun eta zer ez. Hala ere, sare sozialaren kontra sekulakoak eta bi esaten dituen intimitatearen defendatzailerik sutsuena ere, jo eta su ibiltzen da sakelako mezularitza aplian, diren eta ez diren emoji guztiei kea ateratzen.
  2. The Walking Dead.
    Kaixo Joseluis, Tia Paqui naiz, gonbidatuko nauzu merendatzera?
    Kaixo Joseluis, Tia Pepi naiz, gonbidatuko nauzu merendatzera?

    Orain arte Facebooken gertatu izan dena, orain zure poltsikoan gertatzen da, etengabe, gau eta egun: aspaldi kontaktua etetea erabaki zenuen ‘lagun’ hori linbotik itzuli da ustekabean, eta hortxe duzu, kaparrada ematen batere gupidarik gabe: <brrrrrr> Tia Pepiren mezu bat, duela 20 urte zaharra zen Jaimitoren txiste baten irudiarekin; <brrrrr> unibertsitateko ikaskide aprobetxategi hura, zure apunte eta liburu guztiak uzteko eskatu eta sekula itzuli ez zizkizuna, ‘olakease’-ka; <brrrr> amaren mezu kriptiko bat, zuzentzaile automatikoak bere erara berregituratutakoa, ama ondo ote dagoen galdetzeko deitzera bultzatzen zaituena; <brrrr> duela 20 urte ikusten ez duzun lehengusu hura, kalean ikusiz gero ezagutuko ez zenukeena, bere ezkontzara gonbidatuz…

  3. Taldeak. Taldeak gaizkiaren enkarnazio berria dira: institutuko ikaskideak –gehienekin institutuan zeundela ere hitzik egiten ez bazenuen ere— gertuko familia, urrutiko familia, ostiraleko afarikoak… bi lege unibertsal betetzen dituzte:
    1. Ganorazko zerbait tratatu behar denean (ostiraleko afari hori non eta zer ordutan izango den, adibidez), inork ez du ezer erantzuten. Orain, bati bururatuz gero ‘ikusi 125 Mb-ko bideo super barregarri hau’ estiloko zerbati bidaltzea, orduan bai, orduan deeeenak hasiko dira mezuak bidaltzen. Bideoa taldekide baten ume txikiaren ateraldi batena baldin bada, orduan hurrengo bideoen tamaina, iraupena eta maiztasuna biderkatu egiten da.
    2. Elkarrizketa bizi horiek lanean kontzentraziorik handiena behar duzunean gertatzen dira, beti, salbuespenik gabe.
  4. Deiak. Telefono dei arrunt bat egiten duzunean, deitzen duenak ordaintzen du. Whatsapp bidezko dei bat egiten duzunean, deitzen duenak eta erantzuten duenak, biek gastatzen dituzte 3G konexioko megak (unean WiFi konexiorik ez badute, behintzat). Baina ai! Nobedadea nobedadea da, eta orain, zure tarifako mega guztiak eta telefonoko memoriaren hiru laurdenak gatzik gabeko bideo absurdo eta astunak bidaliz gastatzen dizkizuten ‘lagunek’, soberakinak ere gastatzera behartzen zaituzte Whatsapp bidezko deien asunto hori probatuz.
  5. Adio euskarari!
    whatsapp
    Gauza on bakarra zuen Whatsapp apliak: euskaraz zegoen. Orain hori ere ez :(

    Ahots bidezko deiekin batera, Whatsappek beste ‘berrikuntza’ bat sartu digu, Android sistemarako azken bertsioetan bai behintzat: lehen guztiz euskaratuta zegoen aplia, orain ingelesez agertzen zaigu, telefonoa euskaraz konfiguratuta badugu ere. Lagun batek galdetu dit gaur bertan, ea zer egin behar zen aplia euskaraz jartzeko, eta azkarregi erantzun diot nik: “telefonoa euskaraz baduzu, aplikazioa ere euskaraz agertzen da!”. Neure sakelakoa atera eta, hara! Ingelesez dago orain lehen euskaraz zegoena! Mila esker Whatsappeko lantaldeari! >:(

Eta zuk? Zergatik gorroto duzu Whatsapp?

Etiketak:
6 iruzkin
  • e-gor
    e-gor
    2015(e)ko apirilak 19 at 23:05

    Niretzat okerrena da ez dela komunikazio protokolo ireki edo estandar bat, eta ondorioz telefono bidezko berehalako mezularitzaz baliatzeko Whatsapp erabiltzea aukeratzen badugu, Whatsapp dutenekin soilik egin dezakegula. Azkenean, Whatsapp-ek bukatu du komunikazio mota hori monopolizatzen.
    Konparazio baterako, telefonoz gure konpainia berekoekin soilik hitz egin ahal izango bagenu bezala da (Euskaltel-ekoek Euskaltel-ekoekin, Yoigo-koek Yoigo-koekin…), edo e-mailez gure hornitzaile bera dutenekin soilik komunikatu ahal izango bagina bezala (Gmail-ekoek Gmail-ekoekin, Hotmail-ekoek Hotmail-ekoekin…). Azkenean, hori praktikoa izan dadin, denok hornitzaile bera erabili beharra dago. Eta hori gertatu da Whatsapp-ekin, horri esker konpetentzia dena akatu du. Horrek botere gehiegi ematen dio enpresa bati, eta kaltetuak erabiltzaileak gara beti. Zoritxarrez, hau gero eta gehiago gertatzen ari zaigu: Facebook edo Twitter ere kasu bera dira.
    Baina horri uko egin nahi diogunok gero eta zailagoa dugula. Jada ez dakit zenbat talde eta elkartetan gertatu zaidan komunikazioa Whatsapp bidez izatera pasatzea…

    Reply
    • joxe
      joxe
      2015(e)ko apirilak 19 at 23:22

      Mila esker ekarpenagatik, Igor. Niri harrigarriena egiten zaidana da jende batek komunikazio tresna ‘seriotzat’ hartzea Whatsapp… pare bat aldiz gertatu zait jadanik elkarte, talde baten koordinaziorako posta-zerrenda bat proposatu eta batek baino gehiagok berehala esatea ezetz, askoz eraginkorragoa dela Whatsapp talde bat O.O

      Adin kontua izango da beharbada, ez dakit nik ba!

      Reply
  • Jabi
    Jabi
    2015(e)ko apirilak 20 at 10:05

    Ados, Joxe, esan duzunarekin. Teknozalea izan arren, inoiz ez zait gustatu chat-en kontua (gogoratzen IRC kanalak eta SMS bidezko chat haiek, telebisten teletestuetan agertzen zirenak?), denbora galtzea zela pentsatzen nuen, eta Zer da Whattsap, gela (talde) anitzeko berriketa baino?

    Lehengoan kontatu nizunez, whatsapp-aren erabat kontra nago, batez ere, uneoro konektatuta egon behar eta beraz erantzun behar izate horrekin, Whatssap denbora jale itzela da eta kontzentrazio eragozlea. Ez da bakarra, Facebook ere hor dago eta… Esan bezala, apokalipsi zonbia kalean, metroan, autobusean… Seguru nago kalean zapaldutako mokordoen indizea izugarri igo dela azken lau urteotan.

    Reply
    • joxe
      joxe
      2015(e)ko apirilak 20 at 21:12

      Arrazoia Jabi: horretan, beste hainbat kontutan bezala, neurria da gakoa, eta esango nuke aspaldi galdu dugula neurria denbora-jale horiekin. Jakinarazpenek gobernatzen gaituzte!

      Bakoitza bere jakinarazpen soinuak bizi du! 😅

      Reply
  • e-gor
    e-gor
    2015(e)ko apirilak 21 at 09:56

    Jabi, zuk diozunarekin ere guztiz ados nago. Eta Joxe, niri ere gertatu zait hori elkarte bat baino gehiagotan, eta Whatsapp-ik ez daukazula ohartarazi arren, gero kontuak eskatzen dizkizute bilera batera ez bazoaz, abisatu zutela esanez…

    Reply
  • 300.000 euro bitarteko isuna, norbait Whatsapp talde batean baimenik gabe sartzeagatik | Teknopataren txokoa
    2017(e)ko abenduak 22 at 09:20

    […] ditxosozkoak baditu hainbat eta hainbat gauza gorrotagarri. Eta guztietan gorrotagarriena, sindurarik gabe, taldeak […]

    Reply
Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.