Gure mugimendu, ongizate eta informazio askatasunen gainetik bizi den futbolkrazia batean bizi garenez, esango nuke futboleko erakunde handiek egin lezaketen gutxienekoa dela, eguraldiarekin egiten den bezala, mugikortasun eta konektagarritasun askatasunaren murrizketen iragarpen publikoak egitea, zeren, oh sorpresa, denok ez baikara futbolzaleak, eta ez baitugu zertan jakin noiz dagoen futbol partida bat eta noiz ez. Badirudi La Ligaren estrategi berri eta magnanimoa dela blokeoak mugatzea oihartzun handiko partidak jokatzen diren ordu tarteei soilik.
Baina tira, hemen lehenengoa lehenengo: axola duena futboleko jauntxoen poltsikoak betetzea da, eta ez jendea libreki mugitu edo informatu ahal izatea. Oraingoz, eta atzokoan Txo! eta Urtzai rekin Mastodonen izandako elkarrizketari jarraituz, neuk ekarriko dizuet asteburuko iragarpena, ComputerHoy webgunean irakurritakoaren arabera. Eta taula eskuz erauzi dut, e? Ez diot eskatu ChatGPTri berak egiteko.
2025/03/14ko asteburuko blokeo arriskua partidaka
| Eguna | Ordua | Partida | Blokeo aukera |
|---|---|---|---|
| 2025/03/14 | 21:00 | Las Palmas – Alaves | Baxua |
| 2025/03/15 | 14:00 | Valladolid – Celta de Vigo | Baxua |
| 2025/03/15 | 16:15 | Mallorca – Espanyol | Baxua |
| 2025/03/15 | 18:30 | VIllareal – Real Madrid | Altua |
| 2025/03/15 | 21:00 | Girona – Valencia | Baxua |
| 2025/03/16 | 14:00 | Leganes – Betis | Baxua |
| 2025/03/16 | 16:15 | Sevilla – Athletic | Baxua |
| 2025/03/16 | 18:30 | Osasuna – Getafe | Baxua |
| 2025/03/16 | 18:30 | Rayo Vallecano – Real Sociedad | Baxua |
| 2025/03/16 | 21:00 | At. Madrid – FC Barcelona | Oso altua |
Hortxe ba, jaso ahal izan dudan informazioa. Ah! Eta VPNak erabiltzen dituzuenok, ez irribarre gehiegi egin. Dirudienez futbol askatasuna defendatzeko borrokan, VPNak dira, hain zuzen ere, La Ligaren hurrengo jomuga…
Ai, non geratuko zen Leo Bassiren Liga Antifútbol egitasmo hura!!! 🙄
