Ez naiz nekatuko errepikatzen: gaurko egunez, 2025eko otsailaren 1eko dataz, ez dago arrazoi objektibo onargarri bakar bat ere sare sozial komertzialetan jarraitzeko.
Twitter dagoeneko ez da existitzen. Elon Muskek erosi eta X bihurtu zuen. Ultraeskuineko sare bat, algoritmo manipulatuekin, giza eskubideen aurka, Trumpen alde, epaitegietara jo duena defendatzera bertako erabiltzaile kontuak Muskenak direla, eta ez erabiltzaileonak… Eta tira, Alemania eta Erresuma Batuko alderdi naziei babes espresua ematearekin nahikoa ez, eta Trumpen kargu hartzea ospatzeko, milaka lagunen parean, eszenatoki batera igota, agur naziak amorruz egitera dedikatu zen psikopata baten bozgorailua baino ez da honezkero.
Metaren menpeko sareak ere ez daude hobeto. Trumpen etorrerarekin batera, Zuckerbergek aldaketa sakonak aplikatu ditu Facebook, Instagram, Whatsapp eta Threads sareetan, enperadore berriaren gustukoa ez den woke diskurtsoarekin amaitzeko. Moderazio irizpideak lausotu ditu (alde baterantz, noski), eta aurrerantzean, adierazpen askatasunaren mugen barrukotzat, eta beraz, zilegi, joko dute, besteak beste, emakumezkoak etxetresnekin parekatzea, trans edo LGBTQ+ kolektiboko jendea iraintzea, eta abar eta abar. Are gehiago: enpresako berdintasun, aniztasun eta parekidetasun plan guztiak bertan behera utzi ditu Zuckerbergek bere bulego guztietan, Trumpen politikarekin lerratzeko.
TikTok ez da estatubatuarra, baina horrek ez du hobea egiten. Frogatuta dago Txinako sare sozialak aztertuta daukala 35 minutuko kontsumoa nahikoa izan daitekeela sarea erabat adiktibo bilakatzeko, eta era guztietako trikimailu sozio-psizkologikoak erabiltzen dituela -nahita- adin txikikoak menpeko bilakatzeko.
Berriz esango dut: gaurko dataz, ez dago arrazoi objektibo onargarri bakar bat ere inork borondatez jendaila horren gatibu egon nahi izateko. Ez maila pertsonalean, noski, baina are gutxiago oraindik aktibismora, giza eskubideen zaintzara, kulturgintzara, zaintzara edo, oro har, jendearen alde egiters emandako edozei talde, entitate edo kolektiboren izenean. Behinola sare sozialak izandako horiek, kakaztearen kakazteaz, etekin ekonomiko edota ideologikoen alde eta erabiltzaileen kontra diharduten makina erraldoiak bilakatu dira. Hori hala da.
Azken asteotan etengabe esaten ari naizenez:
- nik ez dut psikopata horien menpe egon nahi.
- ez dut nahi estimuan dudan beste inor ere horien esku laga.
- seguru nago: zuk ere ez duzu potxingo horietan lokaztuta ibili nahi.
Global Switch Day
Horregatik, duela egun batzuk #goazenlagunok ekin nola, gaur gonbidatu nahi zaitut mundu mailako #globalswitchday ekimenarekin bat egin, eta GAUR BERTAN, 2025eko otsailaren 1ean, zure saretze/komunikazio plataformak aldatzera. Ez naiz ur handitan sartuko, baina hemen aukera batzuk.
Xtik eta Facebooketik Mastodonera
Xan baldin bazabiltza, animatzen zaitut Mastodon microblogging sarea probatzera. Jende jatorra dabil, ez dago giroa nahita kakaztuko duen algoritmorik, eta aniztasuna, askatasuna eta iritzi aniztasuna benetan errespetatzen dira. Mastodon.eus zerbitzarian sortu dezakezu kontua, adibidez.
Instagrametik Pixelfedera
Testuak baino, irudiak partekatzea gogoko baduzu, Instagrameko putzutik atera eta Pixelfed proba dezakezu. Irudiak partekatzeko sare federatu honetan ez duzu influencer saldurik topatuko, eta benetan jarraitzen diozun jendearen edukia agertuko zaizu, eta ez algoritmoak zuretzat aukeratzen duenarena. Euskarazko instantzia bat ere badugu, Pixelfed.eus.
Youtubetik Peertubera
Bideogintzan baldin bazabiltza, Youtubeko infernu publizitariotik ere atera daiteke, lagun! Peertube bideogintza sare ireki eta federatua da, eta bai, kasu honetan ere, badugu euskarazko zerbitzaria, Peertube.eus!
TikToketik Loopsera
Bideo laburrak nahiago badituzu, umeak zein helduak 35 minututan adikto bihurtzeko diseinatuta dagoen TikTok-ek ere badu alternatiba osasungarriagoa. Loops du izena eta, momentuz hasi berri badago ere, oso-oso itxura ona du!
Whatsappetik Signalera
Seguruenik hau da aldaketa zailena, baina baita garrantzitsuena ere. Gehienetan jabetzen ez bagara ere, Whatsapp erabiltzen dugunean, gure eguneroko komunikazioa Mark Zuckerberg soziopataren esku uzten ari gara. Ez dago modurik benetan jakiteko nola erabiltzen duen gure eguneroko elkarrizketa guztien informazioa, besteak beste, hauteskunde emaitzetan eragiteko. Baina frogatuta dago erabili, erabiltzen duela.
Whatsapp ez da mezularitza zerbitzu bakarra. Pribatutasun eta segurtasunaren aldetik Signal da alternatiba egoki bat. Animatu eta eman pausua. Zu aldatzen bazara, benetan estimatzen zaituen jendeak ere berdin egingo du. Ez gara jabe zer erraz eragin ditzakegun honen moduko aldaketa handiak oso keinu txikiekin!
Eta zu? Animatuko zara otsailaren 1 honetan aldaketa horietako BAT gutxienez egiten? Hala bada, ez ahaztu komentatzea, #GlobalSwitchDay eta #Aldaketa traolekin ;-)
Kanpainako irudi guztiak: https://mastodon.social/@sylv_a
